Hemen zaude: Hasiera Hemeroteka Azpitarte anai-arrebek dantza solteko txapelketa bigarren aldiz irabazi dute

Dokumentuaren akzioak

Azpitarte anai-arrebek dantza solteko txapelketa bigarren aldiz irabazi dute

Basterretxearen eskultura Azkoitira eramango dute hurrengo urtera arte Eneko Gil eta Nerea Vesga, bigarren

Egilea
Andoni Etxeberria
Komunikabidea
Diario Vasco
Tokia
Segura
Mota
Albistea
Data
2006/06/19

Ohizkoa den moduan, bikote parte hartzaileek fandangoa txistuz eta Arin-Arina trikitixaz dan-tzatu zituzten eta epaimahaia Euskal Dantzarien Biltzarreko Joxe Joan Ugalde, Karlos Sarriegi, Rafa Salaberria, Joxe Antonio Atxukarro eta Gabriel Alonsok osatu zuten. Irabazleek Nestor Basterretxeak egindako trofeoa beraien herrira eramango dute hurrengo urtera arte eta saritan jaso zituzten baita ere 680 euro, txapela, lepokoa, euskal makila, oroigarriak eta lau bidaia.

Azpitarte anai-arrebak oso pozik zeuden lortutako garaipenarekin eta dantza jardunean lasai eta oso gustura aritu zirela zioten. «Hamar aldiz baino gehiagotan parte hartu dugu lehiaketa honetan eta zilarra eta brontzea irabazita bagenituen ere, iaz lortu genuen garaipenak konfiantza handia eman zigun. Horregatik oso lasai etorri gara gaur eta dantzan aurrena aritu beharrak ere ez digu eragozpenik suposatu. Bai fandangoan zein arin-arinean urrats batzuk berriak sartu ditugu eta hurrengo urtean ere ondo prestatuko dugu txapelketa, Basterretxearen trofeoa Azkoiti aldera eramateko».

Gogoratu hiru aldiz jarraian irabazi behar dela lehiaketa eskulturaren jabetza lortzeko eta ,datorren urtean gailentzen badira, bigarren bikote azkoitiarra izango da trofeoa eramaten, aurrez Kimetz Larrañaga eta Eneritz Epeldek eskuratu baitzuten.

Hamabi bikote

Atzoko lehiaketan 12 bikotek parte hartu zuten, Bizkaiko bat ezik denak gipuzkoarrak. Puntuazioari dagokionez, Azpitarte anai arrebek 371, 25 punturekin lortu zuten garaipena. Eneko Gil eta Nerea Vesgari 359,75 puntu eman zizkieten epaileek eta 359, 25 hirugarren egin zuten Aitzol Ena eta Miren Illarretari.

Jantzien dotorezia nabarmentzeko sariketa ere ohizkoa da txapelketa honetan eta atzokoan lehen saria Hernaniko Xabier Segura eta Lierni Martiarenak irabazi zuten eta bigarren saria Eneko Gil eta Nerea Vesgarentzat izan zen. Bikote gazteenarentzat gordetzen den Gillermo Areizaga saria Bergarako Jon Arrillaga eta Izarne Mendiak eskuratu zuten.

Atsedenaldian eta epaimahaiak sailkapena egiten zuen bitartean, Iñaki Telleria eta Joxe Joan Ugalderen Ziklus Dantz ikuskizuna eraman zen oholtza gainera, Segurako frontoia betetzen zuten dan-tza zaletuentzat oso gustagarria suertatu zena.

Dokumentuaren akzioak