Jose Mari Orbegozoren Dantzaki dantza eskolako kideen txanda izango da asteburu honetan. Azpeitia Dantzan egitasmoaren barruko hirugarren emanaldia eskainiko dute areto dantzetako ikasleek igandean, 19:00etan hasita, Soreasu antzokian. Horiek urtean zehar ikasitakoak erakutsiko dituzte agertokian, Orbegozoren gidaritzapean; askotariko doinuak eta dantzak ikusi ahal izango dira.
Emanaldirako gonbidapen ia guztiak agortuta daude, baina oraindik gelditzen dira gutxi batzuk. Horiek Kulturaz kooperatibaren webgunean eskura daitezke, doan.
Uztailaren 16an, igandez, bukatuko da Azpeitia Dantzanen aurtengo edizioa, Itsasi kultur taldeko kideen emanaldiarekin. Duela bi aste hasi zen herriko dantza taldeen emanaldien zikloa, eta ordutik dozenaka eta dozenaka herritar izan dira Soreasun, askotariko dantzez gozatzen: honako lotura honetan ikus daitezke Luis Beltzaren dantza suelto eskolako kideen emanaldiko irudiak, eta honako honetan, berriz, Sahatsa dantza taldekoek eskaini zutenekoak.
