Edukira salto egin | Salto egin nabigazioara

Tresna pertsonalak
Hemen zaude: Hasiera Hemeroteka Azken lanen laburpena

Dokumentuaren akzioak

Azken lanen laburpena

Alurr dantza taldeak 'Soinaz' ikuskizun berria eskainiko du etzi Zaldibiako Resti pilotalekuan, 22:30ean

Joan den astean Lekeitioko (Bizkaia) ikusleen harrera beroa jaso ondotik, Alurr dantza taldea Zaldibira (Gipuzkoa) helduko da etzi, Soinaz izeneko ikuskizun berria eskaintzeko. Urtero emanaldi berri bat plazaratzen du Ibarrako (Gipuzkoa) taldeak, eta aurten ere ez du hutsik egin. Hain zuzen, azken urteotako lan guztien laburpen bat eskainiko du Soinaz ikuskizunean. 22:30ean hasiko da, Zaldibiko Resti pilotalekuan. Sei euroan salduko dituzte sarrerak.
Egilea
Jon Eskudero
Komunikabidea
Berria
Tokia
Donostia
Mota
Albistea
Data
2013/09/11
Lotura
Berria

Ikuskizuna hiru zatitan banaturik egongo da. Lehenengoak Sua izeneko emanaldiarekin izango du lotura. Besteak beste, sua, lurra eta ura irudikatuko dituzte ikuskizunaren hasieran. Ondoren, Oinazez ikuskizunaren arrastoak erakutsiko dituzte. Zuberoako makil jokoa, xuletinoa, banakoa eta beste dantzatuko dituzte. Azkenik, berriz, Oreka TX taldeari lotutako dantzak egingo dituzte. Tarteren batean Mikel Laboaren abesti batekin dantzatuko dira, eta, zati horretan, ikuskizun osoan bezala, euskal dantzetako pausoak eta dantza berritzailea uztartuko dituzte.

Koreografiak, Aiert Beobidek

Emanaldiak hainbat zati izan arren, guztiek ildo berari jarraituko diote. Ordubete eskas iraungo du ikuskizunak, eta, hasi eta buka, loturik egongo da dena. Zati bakoitzaren aurkezpena dantza bidez egingo dute. Koreografiak Aiert Beobide dantzariak prestatu ditu, eta arroparen diseinuaz Ramon Garcia arduratu da. Zaldibira joan ezin duenak Tolosako Kilometroetan izango du hurrengo aukera.

2010. urtean, 'Oinazez' ikuskizuna estreinatu zuten. 'Soinaz'-en lan horren arrastoak aurki daitezke. / ALURR TALDEA

Dokumentuaren akzioak