Listo. Amaitu dira. Aurtengoz Ugarteko festei agur esateko ordua iritsi da. Asteburu beteari amaiera emateko azken dantza dantzatu zuten atzo iluntzean ugartearrek: ingurutxoa.

Eskualdean berezia den dantza da ingurutxoa; Bedaion eta Ugarten dute bereizgarri. Irailean bedaiotarren txanda izan bazen ere, atzokoan Ugarteko auzotarrena izan zen, Errosarioko Amaren festekin batera.

Aurretik, entseguak izan dituzte egun handian dantzan atera aurretik. Lan horretan, hain zuzen ere, umeak trebatzen aritu dira Gotzone Zubillaga eta Leire Sagastume. Eta urtero bezala, euren dedikazioa antzeman da dantza taularatzeko orduan. Dantza bizirik mantentzeko ezinbestekoa baita transmisioaren harian etenik ez izatea. Honela, hari horri aurtengoan dantzari berri bat gehitu da: Nere Amondarain.

Musikari dagokionez ere, aurtengoak berritasuna izan du. Urte luzetan ingurutxoa musikatzen Garikoitz Llobregat txistularia aritu bada ere, aurtengoan testigua pasa dio Xanti Nazabali. Txistulari berria, plaza zaharrerako.