Aurtengo lehen maskarada

Barkoxeko 48 herritar arituko dira gaur eta datozen asteetan Zuberoako inauteri berezia plazaratzen

Denera 48 herritar arituko dira gaurko maskaradan, eta hurrengo asteetan Zuberoan barrena ibiliko dira igandero, herriz herri, herrialdeko inauteri berezia ospatzen. Kauterak sei izango dira barkoxtarren taldean, normalean lau izaten badira ere. Horien ondoan sei buhame eta bi buhamina (emakumezkoak) arituko dira.

Joanes Etxebarria Xiberoko Botza irratiko kazetariak antzeztuko du Kabana handia. Pitxu pertsonaia Daniel Lagunek egingo du. Buhameen nagusia Mattin Agor izango da. Kantariak Christophe Galant eta Alain Etxeberri izango dira eta jauna Arño Lexardoi izango da, eta alboan izango du Cecile Ordokihandi anderea. Ohikoak ez diren pertsonaiak agertuko dira aurten Barkoxeko maskaradetan: hartza eta apaiza. Hurrengo emanaldia urtarrilaren 18an egingo dute, Eskiulan. Ezpeizen izango dira 25ean. Otsailaren batean Urdiñarben, 8an Atharratzen, 15ean Muskildin eta martxoaren 1ean Altzürükün.

MASKARADAK

Noiz. Gaur, 10:00etan barrikadak eta 15:30ean maskarada, Barkoxeko plazan (Zuberoa).