Hemen zaude: Hasiera Hemeroteka Aukeran dantza taldearen 'Gernika' ikuskizuna lagunduko du EGOk

Dokumentuaren akzioak

Aukeran dantza taldearen 'Gernika' ikuskizuna lagunduko du EGOk

Hiru emanaldi eskainiko ditu orkestrak neguko denboraldian: Gasteizen, Bilbon eta Donostian

Egilea
J. Eskisabel
Komunikabidea
Berria
Tokia
Donostia
Mota
Albistea
Data
2010/12/28
Lotura
Berria

Aukeranek iaz estreinatu zuen Gernikako herriaren bonbardaketan oinarritutako koreografia. Donostiako Antzerki Ferian aurkezpena egin ondoren, Gernikan bertan taularatu zuen hilabete batzuk geroago. Hamalau sekuentziatan banaturik, «hondamendiaren aurreko eta ondorengo herri baten istorioa» azaltzen du ikuskizunak, Edu Muruamendiaraz zuzendariaren hitzetan. Picassoren koadro ezagunaren bost irudi aukeratu dituzte, eta dantzariek agertokian irudikatu egiten dituzte, oihal elastikoak erabiliz. 1937ko apirilaren 26ko bonbardaketan hildakoen zerrenda errezitatzen duten unea da Gernika ikuskizuneko unerik hunkigarrienetakoa.

Aitor Amezagak —80ko hamarkadan Akelarre plaza taldean ibilitako musikaria— sortu du ikuskizunerako musika —Pablo Sorozabalen Hileta Martxa ere erabili dute—, eta gidoia eta eszena zuzendaritza Garbi Losadak eta Jose Antonio Vitoriak partekatu dute. Gasteiz, Bilbo eta Donostiako emanaldietan Euskal Herriko Gazte Orkestrako 48 musikariak, 12 kantari eta 10 dantzari elkartuko dira oholtzaren gainean.

Euskal Herriko Gazte Orkestra 1997an sortu zuen Eusko Jaurlaritzak, eta negu honetakoa 27. denboraldia izango da. 

Dantza tradizionala eta garaikidea uztartzen ditu Aukeran taldeak Gernika, mihise gaineko dantza ikuskizunean. / IGNACIO PEREZ

Dokumentuaren akzioak