Dokumentuaren akzioak
Arteagan egingo dute Busturialdeko dantzari nagusien XXIV. eguna
Eskualdeko dantza taldeen saioak, afaria eta erromeria egongo dira azaroaren 13an.
19:00etan hasiko da ekitaldia, herriko frontoian. Dantza ugari eta
askotarikoak ikusteko aukera paregabea izango da egun horretan Gautegiz
Arteagan. Dantza asko, eta baita hainbat dantza talde ere.
Eskualdeko herrietatik iritsiko dira dantzariak Gautegiz
Arteagara. Nola ez, herrikoak bertako Artiekoak ere dantzan ikusteko
aukera izango da. Bestetik, ohi legez, eskualdekoa izan ez arren Bakioko
neska-mutilek ere parte hartuko dute Busturialdeko dantzarien egunean;
hain zuzen, Itxas Alde dantza taldea gerturatuko da Arteagara. Bermeoko
Alkartasuna, Mundakako Gazte Zar, Busturiko Irrintzi Alai, Foruko
Urdaibai eta Gernika-Lumoko Elai Alai dantza taldeak izango dira
gainontzeko taldeak.
Talde horiek guztiek hainbat dantza dantzatuko dituzte.
Lehenengo guztiak batera ariko dira eta gero, ostera, bakarka.
Bukatzeko, larrain dantza egingo dute eta, gainera, nahi duen orok
izango du parte hartzeko aukera.
Dantzen ostean, afaria eta erromeria
Dantzak amaitu ostean afaria egongo da. Afarira joan nahi duenak
Aretxederreta kultur etxean eman beharko du izena, azaroaren 5a baino
lehen. Menuaren baitan otarrainxkak, zainzuriak, okela eta mariskodun
paella, okela txanpinoi eta patatekin, tarta izozkiarekin eta kafea
sartuko dira. Egun horretan Gautegiz Arteagan afaldu nahi duenak 20 euro
ordaindu behar izango ditu. Izena ematekorakoan ordaindu beharko da.
Ez da hor amaituko eguna, izan ere, afariaz gain, erromeriaz gozatzeko aukera izango dute bertaratutakoek.
XXIV. Busturialdeko dantzari nagusien eguna
Hauek dira Busturialdeko dantzari nagusien egunean parte hartuko duten zazpi dantza taldeak.
Artie dantza taldea (Gautegiz Arteaga). Itxas Alde (Bakio). Alkartasuna dantza taldea (Bermeo).
Gazte Zar dantza taldea (Mundaka). Irrintzi dantza taldea (Busturia). Urdaibai dantza taldea (Forua).
Elai-Alai dantzari taldea(Gernika-Lumo).
Dokumentuaren akzioak