Aldundiko Kultura sailak 2024ko arte eszeniko eta musikalen arloko prestakuntza ekintzetarako laguntzen deialdia ebatzi du, 20.000 eurokoa. Aurkeztutako eskaeretatik, lau aukeratu dituzte; musika eta kantu arloko Pablo Lopez Ortegak, Julen Arzamendik, Beatriz Bertalottok eta arte eszenikoetako Urtzi Ganzadok jasoko dute 5.000 euroko laguntza.
"Garrantzitsua da laguntza mota horien aldeko apustua egitea, atzerrian prestakuntza jaso dezaten eta beren etorkizuneko lanen kalitatea gero eta handiagoa izan dadin. Horrek, era batera edo bestera, eragina izango du lurraldean", adierazi du Kultura diputatu Ana Del Valek.
Prestakuntzarako beka
Deialdi honek hogei urte baino gehiago daramatza jada indarrean, eta ehun pertsonari baino gehiagori eman die beka. 18 eta 30 urte bitarteko gazteei zuzenduta dago, eta espezializazio trebakuntza indibiduala sustatzen du arte eszenikoen (dantza, antzerkia, zirkua eta mimoa) eta musikalen arloetan. Laguntzak emango zaizkie 2024. urtearen barruan egingo diren 250 ordutik gorako trebakuntza espezializatuko proiektuei.
