Edukira salto egin | Salto egin nabigazioara

Tresna pertsonalak
Hemen zaude: Hasiera › Hemeroteka › Antzerki eta dantza lanak ekoizteko lau beka emango dituzte Bilbon

Dokumentuaren akzioak

Antzerki eta dantza lanak ekoizteko lau beka emango dituzte Bilbon

Aurten, Euskal Herriko konpainien proiektuak soilik onartuko dituzte, eta lau horietatik bat euskarazkoa izango da

Artistak Egoitzan egitasmoaren bidez, arte eszenikoen eremuko lau proiektu garatzeko diru laguntzak emango ditu Bilboko Udaleko Kultura eta Hezkuntza Sailak. Martxoaren 27ra arteko epea izango dute hala nahi duten antzerki eta dantza konpainiek proiektuak aurkezteko. Aurreko ekitaldietan ez bezala, aurten Euskal Herrikoek soilik izango dute horretarako aukera. Egitasmoaren antolatzaileek lau proiektu aukeratuko dituzte, eta horietako bat, gutxienez, euskarazkoa izango da. Hautatutako taldeek 1.500 euro eta 4.000 euro arteko laguntzak jasoko dituzte sorkuntza prozesuak aurrera eramateko. Eta, horretaz gain, bestelako baliabideak erabiltzeko aukera izango dute, hala azpiegiturazkoak nola teknikoagoak.
Komunikabidea
Berria
Tokia
Bilbo
Mota
Albistea
Data
2013/01/29
Lotura
Berria

BADen aurkezteko aukera

Artistak Egoitzan egitasmoarekin, arte eszenikoen esparruko artista zein taldeak sustatzeko helburua du Udaleko Kultura Sailak. Dramaturgia berritzaileak bultzatzea ere bada Artistak Egoitzan ekinaldiaren xedea, baina ez dituzte baztertuko antzerki eta dantza ildo tradizionalagoak jorratzen dituzten proiektuak. Ez arrazoi horrengatik, bederen.

Aukeratutako konpainiek Bilbaoeszenaren entsegu lokalak erabili ahal izango dituzte, prozesu artistikoa gauzatzeko. Horretarako, 25 egun izango dituzte. Eta, ahal dela, uztailean, abuztuan edo irailean prestatu beharko dituzte lanak; beranduenez, urriaren hasieran. Izan ere, lan osoa ez bada, prozesu artistikoaren lagin bat, behintzat, BAD jaialdian erakustea nahi dute egitasmoaren sustatzaileek. Eta oraindik festibalaren egun zehatzik jakinarazi ez duten arren, urriaren amaiera eta azaroaren hasiera aldera izaten da Bilboko antzerki eta dantza jaialdia.

Iaz, esate baterako, Metrokoadroka kolektiboak Artistak Egoitzan egitasmoaren bekaren bitartez sortzen ari zen lanaren zati bat erakutsi zuen, BADen, Poza: zergatik dantzatzen dute bosniarrek? izenburupean.

Dokumentuaren akzioak