Hemen zaude: Hasiera Hemeroteka Animac jaialdiko animazio filmak emango dituzte Artelekun gaurtik aurrera

Dokumentuaren akzioak

Animac jaialdiko animazio filmak emango dituzte Artelekun gaurtik aurrera

Azken urteko lan aipagarrienetako batzuk pantailaratuko dituzte gaurtik larunbatera bitartean Donostian

Komunikabidea
Berria
Tokia
Donostia
Mota
Albistea
Data
2010/03/02

Sheila Sofianen film laburren hautaketa bat ikusi ahal izango da gaur, horien artean Truth Has Fallen eraikitze bidean dagoen lana. Benetako irudi eta animazioz osatutako 35 milimetroko filma da, James McCloskeyri buruzkoa. Hilketa leporatuta kartzelatutako preso errugabeak askatzeko Centurion Ministeries erakundea sortu zuen McCloskey.

Bihar, Animacen aurkeztutako lan onenen aukeraketa bat eskainiko dute; besteak beste, Please Say Something (David Oreilly), Molt bé les campanes (Laura Gines / Pere Ginard), Salsito (Sandra Ortuño / Victor Gil), La carte (Stefan Le Lay) eta Ohus (In the Air) (Martinus Klemet).

Haurtzarora bidaia

The Lost Objects of Childhood izenburupean, haurtzaroa oinarri duten animazioko filmak emango dituzte etzi, Deborah Levyk zuzendutako saioan. Helduentzako ipuinak dirudite film hauek, eta haurtzaroa dute denek argumentu nagusi: haurtzaroko nahi eta grina zein pentsamendu magikoa. Erresuma Batuan eta AEBetan egindako lanak dira denak.

Ostiralean, Alexander Shirayev (1867-1941) dantzari eta animatzaile errusiarrari buruzko dokumentala emango dute. 1906an kamera bat hartu eta Errusiako folklore dantza tradizionalak jaso zituen Shirayevek. Marrazki eta panpinazko animazio teknika xumea landu zuen gero, eta balio artistiko handiko dantzaren historiaren memoria lana osatu zuen. Victor Bocharovek haren historia jaso du A Belated Premier filmean.

Tabakalerak hartuko du larunbateko egitaraua, haurrei eskainitakoa. Marco Ieiek eta Stefanino De Angelisek gidatutako tailerra egingo dute lehenengo, eta ondoren zazpi film labur independente emango dituzte.

Dokumentuaren akzioak