San Joan egunerako hilabete falta den honetan, aurtengo jaiak iragarriko dituen kartela aurkeztu du Tolosako Udalak. Iaz egin bezala, lehiaketa bitartez aukeratu da kartel irabazlea. 37 lan aurkeztu dira lehiaketara eta, horien artean, Ane Elizegi Agirreren Emakumeak bordon dantzari deiturikoak jaso ditu boto gehien. Aurtengo bozketan, gainera, Kultura, Festak eta Gazteria Departamentuak izendatutako epaimahaiaren botoei Jai Batzordearena ere gehitu zaie.
Elizegik osatutako kartelak erreferentzia egiten dio, jai berdinzaleagoak lortzeko bidean, azken urteotan emakumeek Sanjoanetan izan duten parte hartzeari. Hala, Miren Nazabal Urruzola Udaberri Dantza Taldeko bordondantzaria da karteleko protagonista, eta bere irudiarekin batera, honako mezua irakur daiteke, bordondantzarien arkua irudikatuz: «Sei emakume Bordon dantzari aritu ziren estreinekoz 2013ko San Joan egunean. 2022an lehenbizikoz emakume bat izan zen dantzarien kapitain, Miren Nazabal Urruzola. Erreferente eta mugarri zarete, tradizioa eraldatu eta datozenei bidea irekitzeagatik». Emakumeen parte hartzea indartzeko egin diren urratsen nolabaiteko aitortza egin nahi izan du egileak kartelarekin.
Kartela datorren astetik aurrera banatuko da herriko komertzio eta tabernetan. Kultur etxean ere eskuratzeko aukera izango dute herritarrek. Jaietako egitaraua, berriz, aurrerago aurkeztuko da.
Ane Elizegi Agirreren Emakumeak bordon dantzari kartela:
