«Bizkaian tradizioa da vals pausoak sartzea, Gipuzkoan arraroa bada ere»

Arkaitz eta Nagore irabazleak pozez zoratzen igo ziren oholtza gainera sariak jasotzera eta dantza munduan sartu zieten guraso eta lagunei eskaini zieten garaipena.

Seigarren aldiz parte hartu zuten atzo Segurako txapelketan eta beraien arabera, «aukera asko ikusten genituen aurten irabazteko. Gu, bergarakoak eta hernaniarrak uste dugu ginela faboritoak eta azkenean pronostikoak bete dira lehen 3 postuetan».

Dantza egiteko estiloaz eta sueltoan vals pausoak sartzeari buruz galdetuta zera zioten: «Gipuzkoan arraroa egiten da vals pausoak ikustea sueltoan, baina guretzako polita, tradizioa da Bizkaian eta horregatik sartzen ditugu beti gure dantzetan».

Villabonako hiru

Igandeko lehiaketan 10 bikote aritu ziren dantzan oholtza gainean, horietatik 8 gipuzkoarrak eta bi bizkaitarrak. Gipuzkoarren artean Villabonakoak izan ziren nagusi 3 bikoterekin eta denak txapelketan lehen aldiz parte hartzen zutenak. Denak Villabonako Oinkari dan-tza taldekoak izanik, protagonismo berezia izan zuten bai dantza sueltoko bikoteetan zein atsedenaldian eskaini zuten 'Infernuko hauspoa' koreografia ederrean.

Dantza sueltoko bikoteak orden honetan aritu ziren oholtza gainean: Oier Laborde eta Izaro Otaegi (Villabona), Jon Arsuaga eta Ione Iriarte (Villabona), Aritz Arrillaga eta Amaia Bolinaga (Bergara), Xabier Segura eta Lierni Martiarena (Hernani). Mikel Otegi eta Estela Atorrasagasti (Donostia), Arkaitz Pascuas eta Nagore de las Cuevas (Sestao), Lander Campos eta Haizea Hormaetxea (Leioa), Iker Sanz eta Lierni Kamio (Villabona), Ion Ibarguren eta Idoia Besada (Pasaia) eta Mikel Igartua eta Ibane Baseta (Bergara).