709. urteurreneko Gau Zuria

Aldi bereko hogeita hamarretik gora arte ikuskizun egingo dituzte larunbat gauean hiriko hainbat gunetan

Euskal Herriko nahiz kanpoko hainbat artistak egitasmoarekin bat egin dute. Oreka TX eta Galatea taldeak emanaldiak egingo dituzte, eta Asier Zabaleta artistak, Kukai eta La Intrusa dantza konpainiek ere bai. Haiekin batera, honako artista entzutetsu hauek gonbidatu dituzte: Concha Buika musikaria, Rossy de Palma aktorea, Puerto Candelaria eta Bboy Reveal taldeak, besteak beste.

Museo nagusiak zabalik

Ikuskizun guztiak aldi berean abiatuko dituzte 20:30 aldera, eta 02:00 arte luzatuko dira gehienez. Ekitaldiak honako gune hauetan izango dira: Arriaga plazan, Bidebarrietako liburutegian, BilbaoArte aretoan, Santiago katedralaren atarian, Areatzako pasealekuan eta Deustuko unibertsitateko klaustroan. Gainera, lau museo handik ateak zabalduko dituzte gauez: Guggenheim, Arte Eder museoa, Euskal museoa eta Arte Sakratuaren Elizbarrutiko museoa.

Hiriko erdiguneko eta Alde Zaharreko zenbait eraikin ere jaialdiko protagonista bihurtuko dituzte eta arte erakusleiho gisa erabiliko dituzte gau batez. Hala, Valerio Festi artistak udaletxeko fatxadan ikuskizuna aurkeztuko du: Il Sentimento del Bianco. Gainera, argi instalazio ikusgarriz jantziko dituzte Arrupe pasabidea, Campo Volantin pasealekua, Isozaki dorreetako eskailerak eta Santiago plaza.

Antolatzaileek urteko «arte erakustaldi nagusitzat» jo dute Gau Zuria: «Egitasmo honen helburua da gure hiria eta bere kultura azpiegiturak balioztatzea, arteak eraldatutako hiria gure begien aurrean jarriz eta bere ondarearean ateak parez pare zabalduz». Hartara, arte publikoa, musika, dantza, literatura, antzerkia, diseinua, bideo-sorkuntzak eta ezohiko bisitaldiak gozatzeko aukera izango dute ikusleek. Informazio gehiago: www.bilbao.net.

GAU ZURIA

Zer. Hiriaren 700. urteurrenaren ospakizuna.

Non. Bilbo erdigunean eta Alde Zaharrean.

Noiz. Larunbatean, 20:30ean.

Sarrera. Doan.