“Ohiberritze” ikuskizuna, Zuberoako pastoralaren muina

Zuberoako pastoralaren tradizio ederra Bilbora joango da okasio honetan, eta Jean Pitrau pastoraletik ateratako 12 eszena biltzen dituen Ohiberritze ikuskizuna agertuko du Atharratze-Sorholüze herriko jendeak. Pariseko Le Chatelet antzoki ospetsuan antzeztu da obra hau duela gutxi eta bertan sekulako arrakasta lortu du.

Muskildi herriko kantaria den Pierre-Paul Berzaitzen musikak hornitzen du Jean Pitrau pastorala, eta bertan pertsonaia horren bizitza zabaltzen da, izan ere Jean Pitrauk “bere bizitza osoan nekazari txikien alde lan egin zuen, eta Europako nekazaritza arloko sindikalismoaren aita sortzaileetakotzat hartu da”.  
Ohiberritze lanak pastoral horren hoberena eskaintzen du. Ttitika Recalten testuak ditu, eta Tehenta kanta taldeak eta Juhane Etchebesteren dantza konpainiak antzeztuko dute.

Izan ontsa!