“Ilunabarrean dantzan”, folk dantza proposamena Gasteizen

Ekimenaren lehen saioa ostiral honetan, urtarrilak 13, izango da, 20:00etan hasita , eta bertan Imanol Zabaleta gasteiztarra izango da maisua. Otsaileko saioan, Gari Otamendi añorgarraren txanda izango da, eta martxoan, Miarritzeko Agnés Cecconirena. Apirilean Patxi Montero arituko da maisu lanetan.

Dantza saioetan musika jartzeko Nika Bitchiashvilik (biolina), Anton Mimentzak (gitarra), Xabi Gonzalezek (whistle-a) eta Ander Zabaleta trikitilariak osaturiko taldea egongo da. Saio bakoitzean dozena bat dantza landuko dira. Horien artean scottish, mazurka, bourré, chapeloise, circle circassien, bals eta polka, eta horiez gain, Euskal Herrian hain errotuta dauden fandangoa eta arin-arina.

Animatu, izan ere, “adin guztietako jendeari zuzendutako dantza eta zuzeneko musika saioak dira, taldeka zein bikoteka dantzatzen ikastea eta ondo pasatzea helburu dutena. Oinarrizko pausuak oso erraz ikas daitezke eta orduan interakzio eta ñabardura amaigabeen mundu batean murgiltzen da dantzaria.”