“DanZ, Dantza-espazioa”, Iruñean

Azaroaren 3tik 24ra bitartean, Iruñeko Iturramako Civivoxan, dantzaren inguruko DanZ, Dantza-espazioa ekimena antolatu da.

Azaroaren 10ean,  Arantza Iglesias konpainiak Beltza lanaren estreinaldia egingo du. “Molde femeninoan kontatuko dut. Gorputzak astintzen dira, ateratzeari uzteko, eta zapaltzen dute, lurra egiazki ukitzen dutela sentitzeko. Perkusio hutsa, erritmoa. Erritmoa gorputza baita. Gorputzak konta dezala. Kontatzeko asmorik izan gabe. Gogoz, zeuk zure irakurketa egin ahal izan dezazun”.

Azaroaren 12an, Lamajara taldeak Lamajara y sus quehaceres... El Buhonero izeneko lana egingo du. Zorabiozko ikuskizuna, espontaneoa, zentzugabekeriaz eta umorez betea, bi pertsonaia bitxi eta oportunistaren eskutik, eta beren artea defenditzen dutenak.

EnÁmbar Danza taldeak NADAdora izeneko lana eszenaratuko du, 17an. Dantza, testua, ikus-entzunezkoa eta zuzeneko musika erabiltzen dira obra honetan, eta ezereza (nada) eta igeri egitea (nadar) dira haren gaiak.

Azkenik, Nafarroako Atena fundazioko Pasos de Integración konpainiak Mientras llueve obra egingo du azaroaren 24an. Antzerkirako dantza-ikuskizuna, dibertsitate funtzionala duten artisten eskutik.