‘Martin Zalakain’ ikuskizuna bihar eta etzi, Viktoria Eugenia antzokian

Argia dantza taldeak eta Artedrama konpainiak elkarlanean prestatu dute ikuskizuna, Juan Antonio Urbeltzen zuzendaritzapean. Ander Lipus arduratu da antzerki zuzendaritzaz eta On Pio pertsonaiaren rola ere jokatzen du. Gidoia Harkaitz Canok idatzi du, eta ikuskizuneko dantzak eskaintzeko konpainia desberdinetako dantzariek parte hartzen dute.

Martin Zalakain ikuskizunak Pio Barojaren Zalakain abenturazalea nobela du oinarri. Hain zuzen ere, Martin Zalakain Urbia izeneko fikziozko herriko gazte euskalduna da protagonista. Mutil bihurria da. Ama hil ondoren, Migel Tellagorri zahar ostatu zalearekin hazten da.

Karlos Ohando herriko jauntxoa gorrotatzen du. Ohando Martinen arrebaren atzetik dabil eta honek engainatu ez dezan, Martinek bere laguna den Bautista Urbiderekin ezkontzea lortzen du. Senar-emazte berriak Zaro izeneko Iparraldeko udalerri batera bizitzera joango dira, baina gerora Bautista Martinekin batera abenturetan murgilduko dira.

Abenturak Hirugarren Gerra Karlistan girotuta daude, eta hori oinarrian hartuta dantza eta antzerkia uztartzen ditu ikuskizunak.