‘Dantza Idiazabalen’ bilduma aurkeztu dute Udalak eta Axari taldeak

Aurkezpen ekitaldian Axari dantza taldeko Eba Jone Elortzak, Dani Oiarbide zinegotziak eta Beatriz Mena Kultura teknikariak parte hartu dute.

Dantza Idiazabalen bilduma, iaz izen berarekin antolatu zen erakusketa egin ondoren sortu den proiektua da.
Iazko otsailean, Idiazabalen dantzaren arloan egin den lana eta dagoen ondarea herritarrei erakusteko ahalegina egin zen. Kultura batzordearen eta Axari taldearen helburua herrian garrantzia handia izan duen dantza munduaren lana ezagutzera ematea eta dantza taldea indartzea izan zen.

Idiazabaldarrek 1930etik gaurdainoko material asko jaso zuten: arropa, banderak, dokumentuak, argazkiak… Erakusketa denbora gutxiz egon zen ikusgai eta jasotako guztia gordeta gera dadin Dantza Idiazabalen bilduma prestatu dute.

Lan hau DVD batek eta CD batek osatzen dute. DVDan bi bideo  daude: iaz Idiazabalgo dantza taldeak ardatz hartuta antolatu zen mahai inguruarena eta erakusketari buruzkoa.

CDan, berriz, azken 80 urteetan ateratako argazkiak jaso dituzte: garai bateko dantza taldeenak, Arkaitz taldearenak eta Axarirenak. Sueltoko dantzarienak ere bildu dira.

Ia 500 argazkik osatzen dute bilduma. Iazko erakusketarako jasotako argazkiak dira guztiak, herritarrek utzitakoak.

Irudi berezi asko ikus daitezke: 50eko hamarkadan egindako azken soka-dantzaren argazkia, 70eko hamarkadan Idiazabalgo Arkaitz dantza taldeak eta Lazkaoko dantza taldeak Idiazabalen egindako dantzari txiki eguneko irudiak, San Blas jaietan antolatutako lehenengo dantza suelto txapelketakoak eta Axari dantza taldeak herrian eta herritik kanpo egindako emanaldi ugarietako argazkiak.

Bilduma hau eskuratzeko bi modu daude. Alde batetik, Idiazabalgo Izpar dendan erosteko aukera izango da, 5 euroren truke. Bestetik, herritik kanpo bizi direnek kultura@idiazabal.info helbide elektronikora mezua bidali behar dute helbidea emanez. 6 euroren truke jasoko dute.

Axari taldeak eta Udalak eskerrak eman nahi dizkiete argazkiak utziz edo beste modu batera bilduma hau osatzea posible egin duten guztiei. Baita dantzak herrian bizirik eta indartsu jarrai dezan lan egin duten eta lanean ari diren guztiei ere.