200 dantzari bilduko dira bihar Alegian Dantzari Txiki Egunean

Goizeko 10:30etan abiatuko dira kalejiran Larraitz auzoan zehar, eta bertako plazan herri bakoitzeko talde batek dantza bana eskainiko du. Lehen saio honen ondoren, dantzariek hamaiketakoa zain izango dute pilotalekuan. Jarraian Kalebeherara joango dira, eta han beste dantza bana dantzatuko dute.

Zalantzarik gabe, biharko egitarauko unerik garrantzitsuena eguerdi aldera iritsiko da. Dantzari guztiak herriko plazan bilduko dira; lehenbizi herri bakoitzak dantza bat eskainiko du, eta gero 200 dantzarik batera Agurra, Fandangoa eta Arin-arina dantzatuko dituzte.

2006an antolatu zuten lehen aldiz Alegian Dantzari Txiki Eguna, dantza taldeko monitore zen Garazi Bengoetxeak proposatuta, eta lehen esperientzia hura ondo joan zela ikusita, ordutik urtero errepikatu dute. Lehenengo bi edizioetan larunbatez ospatu zuten Dantzari Txiki Eguna; lehen urtean arratsaldez, eta bigarrenean goizez. Iaz, igandera pasa zuten, eta aurten ere halaxe mantendu dute. «Larunbatetan gaztetxoek beste konpromiso batzuk ere izan ohi dituzte, kirol jarduerak esate baterako, eta hori dela eta lehenengo bi edizioetan dantzari batzuk ezin izan zuten parte hartu», argitu dute Martak eta Natik, dantza taldeko arduradunek. «Horregatik, igandez egitea pentsatu genuen, egun horretan ez baitute halako konpromisorik izaten».