Maritzuli: Euskal jantzien erakusketa Baionan

Azken hamarkadetan Maritzuli dantza konpainiak egin dituen jantziak erakusgai egon dira Baionako katedraleko klaustroan abuztuaren 18tik irailaren 13ra. Konpainiak dantzarako josi dituen bederatziehun piezetatik laurogei bat atera dituzte publikora. Jon Olazkuaga Maritzuliko dantzari eta ikerlariak eman dizkigu erakusketaren inguruko hainbat xehetasun. Euskal Herriko hainbat txokotako jantziak egon dira ikusgai XVI-XIX. mendeetakoak. Gehienak jantzi zibilak dira, baina inauterietako mozorroak ere badaude bukaerako zatian. Dokumentu, margolan eta irudi zaharretatik datuak jaso eta interpretatu ondoren osatutako jantziak dira. Claude Iruretagoiena konpainiako zuzendariak eta Maritzuli tailerreko kideek jositakoak eta Maritzuliko dantzariek ikuskizunetan dantzatzeko jantzi dituztenak. Arduradunak oso pozik agertu dira jendearen erantzunarekin, zenbait egunetan zortziehun bisitaritik gora jaso baititu erakusketak. Euskal Herriko beste zenbait lekutara zabaltzea ere gustatuko litzaieke. Irudiak: Amaiur Aristi. Maritzuli, euskal jantzien erakusketa, Baiona, 2020-09-08.