Luzaide: Bolant Eguna 2025

Pazko igandez ospatzen da urtero Bolant Eguna Luzaiden, urteko festa egun handiena, herri goiz eta arrats dantzan aritzen den eguna. Eguraldiak goizeko lehen dantza saioak, bai herri-gunean, bai auzoetan egin ohi direnak errespetatu baditu ere, eguerdirako euria iragarrita zegoen eta kabalkada kale nagusitik abiatu eta zuzenean Arretxe frontoira joan da eta bertan egin dute dantza-saioa harmailak bete dituzten herrikideen eta bisitarien aurrean. Zaldizkoak, zapurrak, makilariak, zigantiak, banderariak, gorriak, neskatoak, bolantak eta musikariak, guztira 150 parte hartzaile inguru izan dira 2025eko Bolant Egunean. Martxak, bolant-dantzak, antrexatak, dantza-jauziak, euskaldunak, sorginak, kontra-dantzak eta makilarien-dantzak dantzatu dituzte eguerdiko saioan. Irudiak: Oier Araolaza. Luzaide, Bolant Eguna, 2025-04-20.