Dokumentuaren akzioak
Albisteak
Putxerriko satorrak: Haur eta helduentzat antzerki-dantza ikuskizuna
Azkaingo ikastolako 15 gurasok sortu eta Joxelu Berasategiren zuzendaritzapean osatu duten ikusgarria da. Maiatzaren 17an Azkainen estreinatu zen antzezlana, oso harrera beroa izan zuen, aretoa bete jende 500 lagun bildu baitziren. Harrez gero Beran, Kanbon, Urruñan, Garazin, Lazkaon, Donostian emana izan da. Apirilaren 18an BILBOko KAFE ANTZOKIAN eskainiko dute.
Dantza Eskola Nazionala sortzeko asmoa izan zenekoa
Imanol Olaizola elkarrizketatu dute Euskonews aldizkarian. Olaizola, kimikaria eta musikologoa da, eta besteak beste Euskadiko Orkestraren sorreran parte hartu zuen. Bultzatu nahi zuen azpiegituraren bat lortu gabe geratu ote den galdetu dio Jose Mari Velez de Mendizabal-ek eta horra erantzuna: "Bai, Dantza Eskola Naizonala".
Cakewalka ragtimearen garaian: dantza jazzaren hastapenetan
Cakewalk-a jazzaren hastapen garaietako dantza da. XIX. mendearen erdialdean abiatu zen Ameriketako hegoaldean, esklabu beltzen kontzentrazio handiak zeuden lurraldeetan. Bere unerik gorenena XIX. Eta XX. mendeen arteko trantsizioan izango du. Hain zuzen ere, Jazz-aren sorreran garrantzitsua izan zen ragtime musika motarekin lotuta agertuko da cakewalk-a. Azken batean cakewalka dantza da eta ragtimea musika, eta ragtimearen doinura dantzatu ziren hainbat cakewalk bi mendeen arteko trantsizio garaietan.
Folklore Azoka bosgarrenez ospatuko da Portugaleten
Elai-Alai Fundazioak antolatuta, datorren maiatzaren 8an eta 9an ospatuko da Portugaleten V. Folklore Azoka. Musika, dantza, artisauak, tallerrak eta beste hainbat ekitaldi bilduko ditu azokak.
Dantzaren hilabetea 2010 Gipuzkoan
Apirilaren 29a, Jean-Georges Noverre (1727-1810) dantza modernoaren aintzindaritzat jotzen den koreografoa jaio zen eguna, hautatu zuen UNESCOk, 1982an, Dantzaren Nazioarteko Eguna ospatzeko. Erakunde horrek dantza era guztiak babesten ditu ofizialki munduko herrialde guztietan, Dantzaren Nazioarteko Kontseiluaren bitartez. 1996tik hasita, Gipuzkoako Dantza Profesionalen Elkarteak, Donostia Kulturarekin lankidetzan, zenbait jarduera antolatu izan ditu jai hori ospatzeko, eta, beraz, aurtengoa hamalaugarren aldia da jarduera-programa bat eratu dena, lanbide horri omen egiteko.
Libertimendua Kanalduden: bolantak, bertsoak eta zirtzilen jokoak
Donibane Garazi eta Donapaleuko Libertimenduen inguruko erreportajea prestatu du Kanaldudek. Antton Luku eta Mattin Irigoien elkarrizketatu ditu Iban Lamarquek eta 2010eko bi emanaldietako irudiekin osatu dute saioa. Iñaki Etxelekuk eman digu Kanaldudek argitaratu dituen bideo hauen berri.
Mixel Elizanburu, dantza-jauziak eta dantza-khorda
Heletan, Nafarroa Beherean jaio zen Mixel Elizanburu 1826an. Lasalletarren ordenean sartu zen eta elizgizon ibilbidea egin zuen, Hazparneko ikastegiko zuzendari izatera iritsiz. "Lehenagoko Eskualdunak zer ziren" liburua idatzi zuen bere gaztetako oroitzapenak eta orduko euskaldunen kontuak bilduz. Liburu horretan dantza-jauzi eta dantza-khordari buruz egiten dituen aipamen batzuk jaso ditugu hona.
Bularrean biloa izan arren tutua janzten duten dantzariak
Les Ballets Trockadero de Monte Carlo Bilbon izango dira apirilaren 16tik 18ra. Nazioarteko dantza konpainia bitxienetako bat da hau. Gizonezkoz osatuta dago erabat, eta emakumeen ballet klasikoan egiten dituzte dantzak egiten dituzte, punta, tutu eta guzti. Besteak beste Beltxargen lakuaren bigarren aktua eskainiko dute Arriaga antzokian.
Plegoaren III. Jaialdia ospatuko dute Ablitas-en
Datorren apirilaren 16, 17 eta 18an ospatuko dute Ablitas-en Plegoaren dantzaren inguruan antolatutako jaialdiaren hirugarren edizioa. Aurten Badajoz-eko talde bat izango dute gonbidatu eta herriko erraldoien konpartsak plegoaren dantza egingo du estreinekoz.
Euskal Herriko Dantzari Eguna 2010: egitaraua eta xehetasunak
Datorren maiatzaren 2an Euskal Dantzarien Biltzarrak Baionan ospatuko duen Dantzari Egunaren xehetasunak ezagutzera eman ditu Gipuzkoako EDBk. Baionako errugbi zelaian egingo da ekitaldi nagusia, eta aurreko egunetan mahainguru bat eta ikuskizun bat izango dira.
Dokumentuaren akzioak
