Mikel Pontesta lezoar dantzari eta dantza-maisuak azken kabriola eman du

Mikel Pontesta Garmendia (Lezo, 1955) dantzaria hil da. Herrian bertan hasi zuen dantzari ibilbidea, eta Donostiara egin zuen jauzi segituan. Allerru, Goizaldi eta Argia dantzari taldeetan ibili da, eta hainbat txapelketatan ere parte hartu izan du. Pasaian Euskal Herriko izendapenarekin jokatu zen lehen aurresku txapelketa irabazi zuen.

Lezoko Allerru dantza taldean aritu zen 14 urtera arte eta hamasei urterekin, 1972an, Xixilio Gastesi errenteriarraren bidez iritsi zen Goizaldira. Iñaki Gordejuela izan zuen dantza-maisu, eta haren bideari jarraipena eman zion. Gordejuela eta Iñaki Arregirekin batera Gipuzkoako dantzen ikastaroak eskaintzen ibili zen han eta hemen. Goizaldiko dantzari, dantza-maisua, eta zuzendari artistikoa izan da. Pasaian ospatzen den gipuzkoar erako Euskal Herriko aurresku txapelketako lehenengo txapela irabazi zuen 1981ean.

Goizaldiko dantzari moduan Argiaren hainbat ikuskizunetan hartu zuen parte Pontestak. Juan Antonio Urbeltzek 1988ko Zortziko ikuskizunerako zenbait taldetako dantzariak bildu zituenenean hasi zen. Han ezagutu zuen Amaia Urruzmendi Argiako dantzaria, ondoren emaztea izango zuena, eta urte luzez aritu ziren dantzan Argian. Taldekide izan ziren eta gerora ondorengoei dantzarekiko maitasuna eta zaletasuna transmititzen jakin izan dute.

Dantzari fina eta jostaria zela nabarmendu dute ingurukoek, eta taldean agertzen zuen umore eta jarrera bereziarekin gelditu dira asko. Taldea osatzeko berezko sena zuen; Jose Joan Ugaldek idatzitako Lezo Dantzari libururako egin zioten elkarrizketan zioen moduan: “Beti disfrutatu izan dut entseguetan oholtzan edo emanalditan baino gehiago”.

Igande honetan egingo zaio agurra, uztailaren 25ean, arratsaldeko 20:00etan Igeldoko frontoian.