Hemen zaude: Hasiera Albisteak Kukaik harrera bikainarekin osatu ditu Kolonbiako emanaldiak

Dokumentuaren akzioak

Kukaik harrera bikainarekin osatu ditu Kolonbiako emanaldiak

Jon Maya
2007/10/07 15:49
Kukai Dantza Konpainiak Manizaleseko Antzerki Jaialdia irekitzeko ardura izan du aste honetan, eta guztira hiru emanaldi egin ditu Kolonbiako Antzerki topaketa esanguratasuenean. Guztiak ere arrakasta handiarekin igaro dira, baina nabarmentzekoa da jaialdiaren inaugurazio ekitaldian Kukaik leporaino betetako Los Fundadores antzokian ‘Otehitzari Biraka’ ikuskizunarekin egindako saioa.
Hona hemen, LA PATRIA egunkariak saio honi buruz bere azalean egindako erreferentzia.

‘Otehitzari Biraka’ eta ‘Taupadak’ ikuskizunak aurkeztu ditu Kukaik Kolonbian, eta biak ere oso arrakastatsuak gertatu dira. Inaugurazio ekitaldian parte hartu izanak ikusmira handia sortu du jaialdiko ikusle eta profesionalen artean, eta horregatik arreta berezia piztu du ‘Otehitzari Biraka’ ikuskizunak. 

Orain Erresuma Batura

Kukai Dantza Konpainiak asteazkenera arte jarraituko du Kolonbian, baina bertatik bere birarekin jarraituko du. Jarraian, Erresuma Batuko Eastleigh hirira abiatuko da ‘1937, gogoaren bidezidorretatik’ ikuskizuna aurkeztera.

Urriaren 9tik 12ra bitartean, ‘Gernikako umeak’ izeneko jardunaldiak burutuko dira Ingalaterra hegoaldeko hiri honetan, eta egitarau horren baitan Kukaik bere lehen ikuskizuna taularatuko du.

Jardunaldi horien baitan hainbat ikuskizun aurkeztuko dira, eta horietako batean Jon Maya dantzariak parte hartze berezia izango du. Erresuma Batuko Lila Dance dantza konpainiak Jon Mayarekin landutako dantza pieza berri bat estreinatuko du arriaren 11ean. Mayak hiru asteko egonaldia egin zuen Eastleighen, iragan abuztuan, eta egonaldi horren fruitua da Lila Dancek aurkeztuko duen koreografia. Dantza garaikidea eta euskal dantza tradizionalaren arteko batuketa interesgarria da lan hau. 

Jardunaldien informazioa: www.thepoint-online.co.uk 

Informazio hau eta beste gehiago Kukai Dantza Konpainiaren webgune berrituan aurki dezakezue.

Dokumentuaren akzioak

Erantzun

Erantzuna emateko identifikatu egin behar zara, gure webgunean erabiltzaile bat sortuz.