Edukira salto egin | Salto egin nabigazioara

Tresna pertsonalak
Hemen zaude: Hasiera Albisteak Jose Inazio Beitia, euskal folklorearen sustatzaile handia hil da

Dokumentuaren akzioak

Jose Inazio Beitia, euskal folklorearen sustatzaile handia hil da

2015/05/20 13:35
Jose Inazio Beitia, euskal folklorearen sustatzaile handia hil da

Jose Inazio Beitia. Arg.: Soarte.

Portugaleteko Elai Alai taldearen eta Nazioarteko Folklore Jaialdiaren sortzaile eta bultzatzaile nagusietakoa izan den Jose Inazio Beitia hil da gaur. 1943. urtean jaioa, Portugaleteko Elai Alai taldearen sorrerako dantzarietakoa izan zen, 1962 urtean, eta ondoren, 1972an Portugaleteko Nazioarteko Folklore jaialdia martxan jarri eta zuzendari lanetan aritu zen hainbat hamarkadaz. Gaur goizean, bihotzeko baten ondorioz hil da Jose Inazio Beitia.

Elai Alai Kultur Elkartetik jakinarazi dutenez hileta elizkizuna bihar, maiatzak 21, arratsaldeko 19:00etan Portugaleteko Santa Maria elizan izango da. Beilatokia: La Auxiliadora-Portugalete (Pando auzoa). Gaur gaueko 20:00 etatik aurrera.

Portugaleteko Elai Alairen sortzaileetakoa

Jose Ignacio BeitiaSestaotik Portugaletera aldatu ziren Beitiarrak gaztetxo zirela, eta 1962an, familiak Bailen kalean zuen lokal batean abiatu zen Elai Alai dantza taldea. Dantza taldea bera sortzeko lehen bilera Beitiatarren etxean egin zuten. Hazkunde izugarria izan zuen elkarteak eta bost urteren buruan 600 bazkidetik gora zituen. Elai Alai bertatik sortu zen 1964-65 inguruan Portugaleteko ikastola. Txistulari taldea, abesbatza eta beste hainbat jarduerari babesa eman zion Elai Alaik lehen urteotan.

Folklore Jaialdiaren antolaketan

1972an abiatu zuen Elai Alaik Nazioarteko Folklore Jaialdia eta bertan aritu da laguntzen Jose Ignacio Beitia jaialdiak egin dituen ekitaldi guztietan. 80ko hamarkadatik aurrera jaialdiaren zuzendari aritu zen Jose Ignacio Beitia, eta Euskal Herriko dantza eta kultura elkarteekin eta nazioartekoekin harreman estuak izan dituen gizona izan da.