Jaime Castillo: Ingrid Bergmani jota dantzatzen erakutsi zion dantzaria

Bi astez jardun zuen Jaime Castillok jota dantzatzen irakasten Ingrid Bergman eta Rip Torni. Filmaren azken muntaian ez zen sekuentzia hori jaso, baina "dantzari, koreografo eta dantza irakasle" bezala izendatuta ageri da bertan Jaime Castillo. Alberto Lopez Etxebarrietak elkarrizketatu du Jaime Castillo, eta bere bizitza artistiko eta bidaiaren hainbat kontu bildu ditu.

Elai Alai, Euzkadi, New York...

Gutxi pentsatuko zuen 1920ko hamarkadan Gernikan jaiotako mutil koskorrak dantzan hasi izanak bizitza aldatuko zionik. Segundo Olaetaren Elai Alai taldean hasi zen dantzan, eta dantza-kideekin batera Frantziara erbesteratu zen hamaika urte zituela. Europan barrena dantza bira egin zuten, eta Frantzian jarraitu zuen bere bizitza, hazi ahala, kantuan eta dantzan. Etxera itzuli, eta Jon Oñatibiaren Euzkadi ikuskizunean parte hartzen hasi zen, eta Estatu Batuetan, kosta batetik beste kostaraino luzatu zen biran parte hartu zuen Castillok. Ikuskizun horretan, orain gutxi zendu den Maria Pilar Beobide izan zuen dantza-bikote. Beobidek ezkondu zenean bertan behera utzi zuen ikuskizuna, eta haren ordez Maria Luz Etxabe, aita gernikarra eta ama bermiotarra zituen estatu-batuarra hasi zen Castillorekin dantzan.

Euzkadi ikuskizunaren bigarren bira bat ere antolatu zen, eta bertan izan zen Castillo, Victor eta Lourdes Olaeta eta beste hainbatekin. Bira bukatuta, Castillo Estatu Batuetan geratu zen, kantu ikasketak egin eta bere ibilbide artistikoari segitzeko asmoz. New York-en egokitu, eta erbesteratutako euskaldunekin harreman handiak izan zituen Castillok: Jose Antonio Aguirre, Jesus Galindez, Jon Oñatibia, e.a. Galindez berari ere jota dantzatzen irakatsi zion Castillok.

Luxuzko trasatlantikoak, Hollywood...

Luxuzko itsas-bidaietan kantatu eta dantzatzen aritu zen luzaroan, trasatlantiko handietako festetan pertsonaia ezagun eta aberatsekin inguratuta beti,  Ingalaterrako Karlos printzea, besteak beste. Mark Goodson ekoizlearen eskutik Hollywood-eko hainbat pelikula eta telebitsa saiotan parte hartzeko aukera izan zuen Castillok, eta Sean Connery, Melvyn Douglas edo Gregory  Peck moduko artista entzutetsuekin lan egiteko aukera izan zuen.

• Jaime Castillo: “Yo enseñé a bailar la jota vasca a Ingrid Bergman”