Henri Duhauren lanen eta elkarrizketen bilduma handitzen Mintzoak-en

Henri Duhau (Beskoitze, 1942) irakasle, dantza-sustatzaile eta idazlearen obra digitalizatuta zuen EKEk Mintzoak.eus atarian, eta, orain zenbait pasarte eta lan gehitu dizkiote. Senpereko Zirikolaz dantza taldeari buruzko liburua ipini dute eskuragarri, baita berari egindako elkarrizketetako zenbait bideo pasarte ere.

Aurrez Dantzanen jaso genuen nola Lapurdiko dantzen historiaren zenbait atal erakusten dituen Henri Duhau-k bere lanen bidez. Lapurdiko inauteriak berreskuratzea 1960ko hamarkadan, EDBren antolaketa, Dantzari Egunak, Beskoitzeko Oinak Arin eta Senpereko Zirikolatz dantza taldeen ibilbideak, edota muxikoen berpiztea.

Duhauren testigantzak

Elkarrizketen bideo-pasarteetan kontu kuriosoak azaltzen ditu. Lapurdiko inauteriez ari denean, adibidez, esaten du berak ezagutu zituen zenbait inauteri oso bortitzak zirela, "pertsonak zirikatzen zituzten, eskarniatzen zituzten, izigarri gogorki, astolasterrak bezala, xaribari".

Zirikolatz taldearen inguruko oroitzapenetan, berriz, kontatzen du neskak jarri zituztela mutikoen paperetan inon baino lehenago. Lapurdiko dantzetan, gonak egin zizkietela eta maskaradetan aitzindari guztietan neskak jarri zituztela, zamaltzaina barne.

Iturria: Henri Duhau (Mintzoak.eus)