Dantzaren historiako altxorrak ikusgai

Espainiako Liburutegi Nazionalak dantzaren inguruan duen liburu bilduma bikaina da, besteak bestea Francisco Asenjo Barbieriren bilduma bertan gordetzen baita, eta dantza liburuen altxor harrigarria da berau. Erakusketan, liburuak, euskizkribuak, grabatuak, tratatuak eta partiturak bildu dituzte, eta otsailaren 8tik maiatzaren 8a bitartean ikusgai daude Liburutegi Nazionalean.

Dantza liburuak Espainiako Liburutegi Nazionalean: Gallardatik Baltsera deitzen den erakusketa egunotan inauguratu da liburutegi bertan dagoen museoko Musen aretoan. Erakusgai dauden material gehienak Liburutegi Errealetik eta Francisco Asenjo Barbieriren bildumatik datoz. Francisco Asenjo Barbieri (1823-1894) konpositore, musikologo eta bibliofilo izateaz gain, dantzarien seme eta biloba zenak, lan eta bilketa asko egin zituen bere garaian eta hil zenean denak Liburutegi Nazionalari eman zizkion. 

Cesare Negri, Thoinot Arbeau eta Pierre Rameau-k, beste batzuen artean, idatzitako lanak aurkitu daitezke bilduman, eta baita, Heinrich Aldegreverrek egindako grabatuak ere. Horrela, horien lanetan Koreologiara egin ziren lehen hurbilketak ikus daitezke, koreografia idazteko saiakera desberdinak alegia.

"Elementos de la ciencia contradanzaria", Don Preciso (Juan Antonio de Iza Zamácola), (m.1819)

• Libros de danza en la BNE: de la gallarda al vals

• Erakusketaren esku-liburua (pdf 2,90 MB)
• Gorteko dantza Biblioteca Nacional-ean (pdf 16 MB)
• Bisita birtuala