Dantza taldeen entseguetarako eta emanaldietarako protokoloa definitu du Jaurlaritzak

Dantza entseguetan eta emanaldietan bete beharreko baldintza eta neurri zehatzak aurkeztu ditu Eusko Jaurlaritzak. Osasun Sailak eguneratu egin du COVID-19aren transmisioa prebenitzeko protokoloak prestatzeko gida, eta jarraibide bereziak ezarri ditu zenbait jardueratarako.

Dantza-talde ez-profesionalen entseguez gain emanaldiak ere baimenduta daudela adierazi du Eusko Jaurlaritzak 2021eko maiatzaren 8an argitaratutako 23/2021 Dekretuan, baina prebentzio-neurrien protokoloa izan beharko dutela. Dekretua argitaratu berritan entseguak egiteko baldintzak zalantzan gelditu ziren, eta orain argitaratu dituzte dantza entseguetarako eta emanaldietarako jarraibideak.

Dantza entseguetarako protokoloa

• COVID-19arekin bateragarriak diren sintomak dituztenek (sukarra, eztula, arnasteko zailtasuna...) edo COVID-19a duten pertsonekin kontaktuan egon direnek ez dute jardueran parte hartuko.

• Entseguak edo emanaldiak aire zabalean edo ondo aireztatutako lekuetan egingo dira. Posible denean, aire zabalean egingo dira. Espazio itxietan, gehieneko okupazioa baimendutako edukieraren %50ekoa izango da.

• Une oro erabili beharko da maskara.

• Oro har, jarduera egiteko pertsonen artean 1,5 m-ko tartea gordeko da.

• Bikoteko dantzak mugatu egingo dira dantza-bikote egonkorretara edo bizikide diren pertsonetara.

• Taldeak egonkorrak izango dira eta, posible denean, pertsonek beti beteko dute posizio bera taldearen barruan.

• Pertsona erreferente bat izendatuko da COVID-19arekin zerikusia duten alderdietarako. Pertsona horrek taldekideei buruzko informazioa bilduko du eta hura eguneratuta izango du, bai eta jardueretako parte-hartzeari eta harremanetarako datuei buruzkoa ere; informazio hori Zaintza eta Jarraipen Sareari emango dio, kontaktuak ikertzeko, beharrezkoa denean.

• Publikoa duten emanaldiak antolatzean, kultura-eta gizarte-ekitaldietarako indarrean dagoen araudian aurreikusten diren prebentzio-neurriak aplikatuko dira.

 
Dantza emanaldietarako araudia

• Instalazio propioetan, kirol-gune itxietan edo beste eraikin mota batzuetan, gehienezko edukiera 50ekoa izango da, gehienez ere 400 pertsonara arte.
• 1.600 pertsonatik gorako edukiera duten aretoetan, gehieneko edukiera 600 pertsonakoa izango da.
• Aire zabaleko ekitaldietan ehuneko 50ekoa izango da gehienezko edukiera, gehienez ere 600 pertsonara arte.
• Pertsonen arteko segurtasun-distantzia mantentzeko beharrezko neurriak ezarri beharko dira, edo, halakorik ezean, babes fisikorako neurri alternatiboak baliatuko dira.
• Maskara erabiltzea nahitaezkoa izango da, nahiz eta pertsonen arteko segurtasun-distantzia 1,5 metrokoa izan.
• Ikus-entzuleak eserita egon beharko dira eta aulkia aurrez esleitzea eskatuko da.
• Artista-taldeei dagokienez, interpreteen arteko interakzioa baimenduta egongo da ikuskizunak irauten duen bitartean.
• Jarduera edo ekitaldi kultural edo sozialik ezingo da 22:00ak baino beranduago amaitu.

Dekretua eta jarraibideak:

• 23/2021 Dekretua, SARS-CoV-2k eragindako infekzioen hedapena geldiarazteko prebentzio-neurriei buruzkoa Dekretua (2021-05-08) (PDF)

• Osasun publikoko jarraibideak, Covid-19aren transmisioa prebenitzera bideratutako protokolo eta plan espezifikoak egiteko (2021-05-14) (PDF)