Bizkaiko aldundiak DantzaBiz sortu du

Bizkaiko Aldundiak, foru dekretu bidez, DantzaBiz, Kulturako Foru Sailari dantzaren inguruko aholkuak emateko batzordea sortu du. DantzaBiz organo aholku-emailea da, Kulturako Foru Sailari atxikita dagoena, nahiz eta sailaren egitura hierarkikoan sartuta ez egon. Batzordeak aholkuak emango ditu sailak dantza sustatzeko egin nahi dituen politikei lotutako gaietan.

Alde batetik, zereginetako bat, lurraldean dantzak zein diren (ohikoa, garaikidea, euskal dantzak eta dantzarekin lotutako arte adierazpide berriak) eta dituzten arazoak eta erronkak, komunak zein espezifikoak, aztertzea izango da. Bestalde, politika publikoen jarraipena egitea eta lehentasunen inguruko adostasunak lortzea. Eta azkenik, Bizkaiko Dantza-Etxea definitzeko garaian parte hartzea, hau martxan jarri eta prozesua jarraitzea alegia.

Aholkularien talde horretan, Kulturako foru diputatua batzordeburua izango da, eta honako kide hauek izango ditu: Batzordeburuordea, kulturako zuzendari nagusia, batzordeko kideak, Kultur Ekintzako Zerbitzuko burua, dantzaren alde lan egiten duten elkarteak, erakundeak eta izen handiko pertsonak (gehienez 12, foru agindu bidez izendatuko direnak), idazkaria eta Kultur Ekintzako Zerbitzuko teknikari bat.