Organik eta Rouge Elea konpainiak aukeratu dituzte Aterpean programarako

Getxoko Organik eta Hendaiako Rouge Elea konpainiek izango dute 2015eko Aterpean programaren baitan beren lanak garatzeko aukera. Uztailean eta abuztuan garatuko dituzte lanok,  Dantza Hirian –Mugaren Bi Aldeetako Dantza Jaialdia hiri-paisaietan– ekimenaren baitako Aterpean egonaldi programan, gerora, irailean, jendartean ezagutzera emateko.

Maiatzean zabaldu zen gaur egungo dantza ikuskizunen sormena, ikerketa eta zabalkundea sustatzeko Aterpean programaren deialdia eta Frantzia, Italia eta Euskal Herriko hamahiru proiektuetatik aipatutakoak izan dira aukeratuak.

Aurtengo aukeraketan euskal kultura, hizkuntza zein historia koreografiarekin harremanetan jartzeari garrantzia eman diote, eta era berean baita lengoaia koreografiko garaikide baten bidez kultura horren elementuak kultura bera berrinterpretatzeko eta barneratzeko erabilita zeudela bermatzeari ere.

Honekin Organik konpainiako Natalia Monge koreografoak Irrintzi lanean irrintziari berari lengoaia koreografikoaren bitartez ematen dion interpretazioa eta Rouge Elea konpainiaren Bleu piezak heriotzaren aurrean dantza egitearen beharraren adierazpena hartu dira kontuan.

Natalia Mongek zuzentzen duen Organik konpainia 2002an jaio zen dantza garaikidearen joera berriak ikertu eta beste arte batzuekin uztartzeko helburuarekin eta orain arte Tellagorri B, Tú o yo, Lilas, Malditas, Carneros eta Txapeldun bezalako obrak estreinatu ditu. Rouge Elea, aldiz, 2003an sortu zuen Corine Cellak eta bere lanek aireko zirkuaren eta dantzaren poetika lantzen dute.