Andra Mari Taldearen eskertza

Galdakaoko Andra Mari dantza taldeak Musika Bizian Jaialdiaren eta bere 60. urteurrena ospatzeko antolatutako ekintzen balantze benetan positiboa egin du. Ekimen horiek musikaz eta jarduerez bete dute herri osoa urriaren 30etik joan den igandera, azaroaren 22ra.

Andra Marik esker berezia helarazi nahi die Galdakaoko herriari eta ikus-entzule guztiei, antolatutako ekitaldiei emandako harrera bikainarengatik. Eta baita Galdakaoko Udalari eta Bizkaiko Foru Aldundiari, eman dioten laguntzarengatik. Eta komunikabideei ere helarazi nahi die bere eskerrona, jarduera horiek guztiak zabaltzeko egin duten lanarengatik.

Musika Bizian Jaialdiaren, Estaturik gabeko herrien Musika Jaialdiaren, bigarren edizioa, urriaren 30ean eta 31n ospatu zen, eta jendez bete zuen Iturriondo plazan instalatutako karpa. Hitzordu horrekin bultzada handia eman zitzaion Euskal Herriko eta beste kultura batzuetako musika folklorikoari. Bertan arrakasta handiz aritu ziren Riobó (Galizia) eta Kepa Junkera + 7 sorginak taldeak ostiralean, urriaren 30ean, eta Stetrice (Bretainia), Brian Finnegan Band (Ipar Irlanda) eta Gozategi taldeak larunbatean, urriaren 31n.   

Joan den azaroaren 7an Benito Lertxundik Urretako Kiroldegian eskaini zuen kontzerturako sarrerak agortu egin ziren. Torrezabal Kultur etxea ere bete egin zen Erramun Martikorena, Mikel Markezek lagunduta, Jean Mixel Bedaxagar eta Aire Ahizpak entzuteko, joan den azaroaren 14an Andra Mari taldeak antolatu zuen Iparraldeko Kantarien Emanaldian. Joan den larunbatean, azaroaren 21ean, ikus-entzuleek goraino bete zuten Krutzeko plazako pilotalekua, hainbat dantzari belaunaldi elkartu zituen "Atzoko, gaurko eta Biharko Andra Mari" musika eta dantza jaialdiaz gozatzeko.

Andra Mari dantza taldeak bihotzez eskertu nahi ditu Galdakaoko herritarrek emandako erantzuna eta Galdakaoko Udalaren eta Bizkaiko Foru Aldundiaren laguntza. Eta eskerrak eman nahi dizkie, baita ere, komunikabideetako profesionalei, gure jardueren berri emateagatik. 

Mila esker eta hurrengora arte.

Prentsa bilbuma:

• Atzoko, gaurko eta biharko Andra Mari

• Galdakaoko Andra Mari taldeak 60. urteurrena ospatuko du azaroan

• Belaunaldi guztiak elkartuko ditu Galdakaoko Andra Marik

• Tres generaciones en danza

• Andra Mari Dantza Taldea mira al futuro

• Andra Mari dantza taldea pone el sábado el broche a su 60 aniversario