Dokumentuaren akzioak
Aitzina Pika, Aitzindariak elkartearen ikusgarria
Zuberoako dozena bat dantza talde biltzen ditu bere baita Aitzindariak elkarteak. Honako herrietako dantzariek parte hartuko dute ikusgarrian: Arrokiaga,
Atharratze, Barkoxe, Eskiula, Iruri, Idauze, Larraine, Ligi-Lexantzü, Maule,
Muskildi eta Urdiñarbe. 63 dantzari, 10 kantari, 10 musikari eta 100 jantzi izango dira dantza, kanta, argi-jokoak eta soinu bereziak izango dituen emanaldian.
Aitzindariak elkarteko Jean Bordaxarrek Euskobizia agerkariari esandakoaren arabera egun Zuberoan egiten den dantzarekin ikuspegi kritikoa erakutsi nahi izan dute ikuskizun honen bidez. Baina badu nostalgia puntua ere bai, garai bateko dantza oroitu nahian.
Dantzariek berek agertu zuten ikusgarri bat egiteko gogoa, eta gogo horri erantzunez ari dira lana koordinatzen Jean Bordaxar bera eta Patrick Queheille Kanpo. Emanaldiaren iragarki afitxa lehiaketa bidez hautatu dute, eta aurkeztutako bost proposamenen artean Anaïs Sagaspe, Eskiulako dantzariak proposatutakoa atera da garaile.
Aitzina Pika
- Urriaren 28an, larunbatean
- Mauleko Jai-Alain
- 21.00etan
- Sarrera: 12 Euro
Ondoko emanaldiak
- Azaroaren 18an Arrasaten
- Abenduaren 2an Getxon
- Abenduaren 23an Biarritzen
- Urtarrilaren 28an Amurrion
Hona Aitzina Pika ikusgarriari buruz Jean Bordaxarrek helarazi dizkigun lerro batzuk:
Bunet gorriaren karietara, besta bat antolatürik da. Alegia edo egia? Zer da gure soa?
Eüskararen erroa ..... galdürik denean .....Gure soa nolako.......mirail aitzinean ?
Egiten ahal düzü...... frisata aidean......Antrexata dükezü....kolpüz bihotzean.
"Soa" kantorearen llabürpen bat (arrapika) : Jean BORDAXAR
Leheneko bi dantzari, gerla ondoko maskaradetaz minberatürik dira. Dolü edo esperantxa ?
Berrogeitazortzian zen maskarada ederra...............Xiberoko lifenta, erran arabera
Denak potiko eta, baziren manera............Indarra bai teknika, beltzek zer eüskara !
Koblen llabürpen bat : Jean BORDAXAR
Neskatilek Xiberotar dantza salbatü dieia ?
Dantza gibel ari beitzen
Erakusten hasi ziren
Talde güzien salbatzen
Ahal dütügü ospatzen.
"Neskatilekin" kantorearen llabürpen bat, Jean BORDAXAR
Eta bihar, herri ohidürekin aski dükegüia ala gure kültüra osoki biziko dügü ?
Izan ontsa berriz arte Zin aitzina aitzina pika
Berriz ontsa izan arte Bi jauzi ondoan Zinka
Laster gira Aitzindarien argiak
Gütan fida Orhi tinia killika
Jüntatüko lagün maite
"Aitzindarien zinka" kantorearen laburpen bat : Mixel ETXEKOPAR.
Dokumentuaren akzioak
Erantzun
Zuberoako Aitzindariak elkartearen Aitzina Pika ikusgarriaren azken emanaldia eskainiko da datorren 2007ko apirilaren 28an Bilbon. Larunbat arratsaldeko 20.00etan izango da emanaldia Bilboko Ayala Antzokian, eta BBKren bidez salgai daude sarrerak.