Moskuko Ballet Nazionala: Intxaur-hauskailua

Haurrentzako ipuinaren itxuran –panpinek bizia hartzen dute Gabon-gauean, eta, ondorioz, neskato protagonistak abentura magikoak biziko ditu–, ballet hau Gabonetako espirituaren fabula da, eta galdutako haurtzaroak eragindako nostalgiaz eta nagusien errealitatearen eta umeen ametsezko munduaren arteko talkaz dihardu.

Balleta Txaikovskiren ezagunenetakoa da, eta Lev Ivanoven jatorrizko koreografia eta Marius Petiparen libretoa dauzka; era berean, Alejandro Dumas aitaren testu batean dago oinarrituta. Azken hori, halaber, E.T.A. Hoffmannen Intxaur-hauskailua eta arratoien erregea izeneko ipuin ospetsuan oinarritu zen.