Dokumentuaren akzioak
Garazi Gorostiaga + Izarne Oyarzabal: Aintzira + Genoveva ferrocide
Aintzira arte eszenikoen kolektiboa da, 2023an sortua eta Bilbon bizi dena. Soinutik, gorputzetik, espaziotik eta haren inplikazio sozial, politiko eta kulturaletatik abiatuta, mendebaldeko gizarteari dagozkion gaiak ikertzen ditu. Garazi Gorostiaga musika ekoizle eta konpositoreak eta Izarne Oyarzabal arkitekto eta dantzariak osatzen dute Aintzira. Biek bakarka zein ingurune esperimentaleko beste artista batzuekin elkarlanean lan egin dute, eta Azkuna Zentroa, Reina Sofia Museoa, La Casa Encendida, Medialab-Prado edo Tabakalera bezalako espazioetan erakutsi dituzte piezak. 2024an, iluntasunari buruzko lehen ikerketa hasi zuen, hainbat alderditan jorratu nahian. Gorputzetik eta soinutik esperimentatzen dute, eta, gaur egun, gai horretara hurbiltzen dira beste baliabide batzuekin sortutako materialak nahastuz.
Aintzira da biltzen gaituen irudimenezko espazioa. Bete eta hustu egiten da, eta paisaia zinematiko desberdinetatik drone, industrial, metal edo ambient soinuekin igarotzen da, butoh edo sorginkeriaren iruditeriak agerraraziz. Aintziran, gorputzaren eta soinu-paisaien bidez, iluntasuna aztertzen dute artistek, iluntasuna beharrezkoa baita sekretuak, intimitateak, isilpekotasunak edo antzekoak agertu ahal izateko, eta ia dena iluntasunetik sortzen baita.
Aintziraren interpretazio honetan, ORNONERAn Genoveva Ferrocideren soinu gordinak taularatzen ditu burdinazko instrumentu forjatuekin, zeinekin soinua gidatuko baitu.
Hori guztia ElektrARTek sortutako argi-paisaia batekin jaisten da.
Aintzira ORCONERA-Lutxana Industria Bildumaren erakusketa-gune berezian taularatzeak Eusko Jaurlaritzako Kultura eta Hizkuntza Politika Sailaren industria-ondarearen bilduma higigarria aktibatzea ahalbidetzen du. Koreografia eta soinu-paisaia zainduak eta argi-paisaiak, Aintzira performancea oinarri hartuta, espazioaren formekin, makinekin, ehundurekin eta erritmo mekanikoekin hitz egiten dute. Era berean, performancearen formatua erakusketa-espaziora egokituta egongo da, eta, beraz, edukiera oso mugatua da.
Esku-hartzearen aurretik, bisita labur bat egingo da Orconerako industria-ondare higigarriaren espazio eta bildumara, ekitaldiaren programazioaren barruan.
Dokumentuaren akzioak
