Ermua: Dantzaren Nazioarteko Eguna

Ermuak Dantzaren Nazioarteko Eguna ospatuko du ostiral honetan, apirilaren 28an. Txindurri, Laune, Fit Gipsy Dance eta Taupada Dantza Eskola herriko taldeek indarrak batu dituzte estilo guztiz desberdineko dantzen ikuskizuna eskaintzeko.

Ekitaldiaren agertokia Orbe Kardinala plaza izango da; euria egiten badu, Merkatu Plaza. 19:00etatik aurrera, lau talde ermuarrek dantzaren artearen forma ezberdinak erakutsiko dituzte. Txindurri Dantza Taldeak euskal folklorea izango du ardatz; Laune akademiak, Andaluziako kultura; Fit Gipsy Dancek flamenkoa eta kirola uztartuko ditu; eta Taupada Dantza Eskolako ikasleek ikuspegi modernoena eskainiko dute.

Ekitaldi honen helburua herria "mugitzea" da, dantzaren bidez giroa ematea eta diziplina hau hainbat koreografia ezberdinekin ikusaraztea.