Iceland dance company: Romeo ❤️ Juliet

 Iceland Dance Company Arriaga antzokian izango da berriro, izenburu karismatiko bat interpretatzeko: Romeo ❤ Juliet. Shakespeareren Romeo ❤ Juliet abiapuntu hartuta, Erna Ómarsdóttirrek eta Halla Ólafsdóttirrek konbinatu egin dituzte dantza garaikidea, arte bisuala eta Prokofieven musika. Lanak jatorrizko historia deseraiki eta aldi bereko narrazio-sare bat sortzen du, herri-kulturaren erreferentziak eta balletaren lengoaia uztartuta. Emaitza, ederra bezain ahaltsua, itzelezko amesgaiztoa da; odolez, maitasunez, ballet-exorzismoz, suz, dantzaz eta heriotzaz betetako mundu abstraktu bat. Romeo ❤ Juliet kontzientziaren hondarretan irristatzen da. Itsasorantz igotzen den ibai odoltsu bat bezala. 

Romeo ❤ Juliet, Erna Ómarsdóttir eta Halla Ólafsdóttir zuzendarien koreografia duen dantza-lan ezaguna, Municheko Staatstheater am Gärtnerplatz balleteko dantzariekin elkarlanean sortu zen berez, eta 2018ko udazkenean estreinatu zen. Orain, lana garatu, egokitu eta birsortu egin da Iceland Dance Company-ko dantzariekin, zeinen birtuosismo eta indarra aski ezagunak baitira Bilboko publikoarentzat.  Ikuskizuna ez da gomendagarria 14 urtetik beherakoentzat.