Leioako Umore Azoka hasiko da gaur "estreinaldi sortarekin"

Jaialdiak aplikazio propioa izango du eta Twitter eta Facebook sare sozialetan jarraipen zabala eskainiko dute antolatzaileek

Orotara, 170 emanaldi baino  gehiago izango ditu egitarauak, eta lau egunez, "kaleko arteen  hiriburu bihurtuko du horrek Leioa".

Ehunka sortzaile, programatzaile eta banatzaile batuko ditu  hitzorduak, eta 35.000 ikusle inguru bilduko ditu. Gaur egun egiten  diren dantza, zirko, musika eta performance ikuskizun onenez  gozatzeko aukera izango dute guztiek.

Estreinaldi gune ere izango da Leioa egunotan, Euskal Herriko,  Espainiako Estatuko eta nazioarteko konpainia askorentzat  "erreferentziazkoa" baita jaialdia, eta Umore Azoka hautatu dutelako  beren lanik berrienak estreinatzeko. Azokako lehen eguna da horren  erakusle; izan ere, ostegun honeetan izango diren 22 emanaldietatik  11 estreinaldiak izango dira.

Euskal Herriko talde askok, esaterako, ostegun honetan egingo dute  estreinaldia: Gaitzerdi antzerki taldeak I. Mundu Gerran  oinarritutako "Out" obra eskainiko du aurrenekoz; 2013an "4x4"  lanarekin Umore Azokako Kale Ikuskizunik Onenaren saria jaso zuen  Ertza dantza taldeak "El show del Espectador" estreinatuko du;  Dikothomiak dantza eta zirkoa uztartzen dituen "Spazi...o" pieza; Pez  Limbok hitzik gabeko "Almacenes Parisien" antzezlana; Colectivo  Hirikok fantasiaz betetako "La Gloïre-les bouffeurs d'ombres" dantza  performance pieza; eta Dantzaz konpainia Arriagaren doinu barrokoak  eta Niña Coyote eta Chico Tornado musika taldearen rocka batzen  dituen "Barrock" lanarekin izango da kalean.

Horrez gain, Hortzmuga Teatro konpainiak "Nola" eta Markeliñe  antzerki taldeak "Andante" antzezlan berriak eramango dituzte ostegun  honetan Leioako kaleetara. "Esanguratsua da datua. Lau egunetan  Euskal Herriko 17 taldek hartuko dute parte Umore Azokan, eta  horietatik 12k lana estreinatuko dute", adierazi dute  antolatzaileek.

Halaber, euskal taldeen estreinaldiez gain, ostegunean bertan,  "Crudo Ingente" izeneko instalazio performancea estreinatuko du Nacho  Vilar Producciones Murtziako taldeak; Mendebaldeko dueluetan  oinarritutako bi pertsonaientzako "Ka-Yi-Ha" dantza eta peformance  pieza eskainiko du aurrenekoz Los Moñekos konpainia katalanak; eta  "Le Petit Studio Cinema" estreinatuko du Compañía de Títeres Errantes  eta Producciones Cachivache taldeak.

TOR MANSION

Bestalde, osteguneko egitarauarekin jarraituz, "kalea zinema  pantaila bihurtuko du" To R Mansion Japoniako taldeak, "Cinema  Paradaise" ikuskizunarekin. Pelikula ezagunetako zatiekin osaturiko  obra berezi da, eta erritmo izugarri biziz nahasten ditu magia,  mimoa, akrobaziak, dantza eta bestelako antzezpenak, istorio zoro  bezain dibertigarria kontatzeko."Guztia, koordinazio eta teknika  harrigarriz, eta beste hainbeste umorez", adierazi dute.

Gainera, Holandatik datorren Compañie Mobil taldeak "Sulky1"  eskainiko du, eta Alemaniako Teatro Só taldeak "Sómente" aurkeztuko  du. Frantziatik helduko da Les Mobilettes konpainia, "Café Frappé!"  piezarekin.

Lehen eguneko programazioa osatuko dute Maintomano taldearen  "Ekilibua" ekilibrismo ikuskizunak, Tania Garridoren "Etzev (Labor)"  piezak, XeviXavoXou taldearen "From lost to the river" ikuskizunak  eta Kataluniako Stampades konpainiaren "Enfila S.A." lanak.

ARTEKALE
Halere, Umore Azoka ez da jaialdia soilik, eta ehunka sortzaile,  programatzaile eta banatzaile batuko ditu Leioan lau egunez. Kaleko  arteen sektorea indartzen laguntzea da Umore Azokaren helburuetako  bat, eta Artekale espazioa antolatuko du horretarako. Bigarrenez  prestatu da gune hori, eta sektoreko ordezkaritza zabala bilduko du  bertan.

Sektorearen topagune izango da espazio hori, eta ostegunean,  esaterako, Kale Antzerkia Bultzatuz egitasmoa aurkeztuko du Eusko  Jaurlaritzak, eta aurkezpenak egingo dituzte kale antzerkiei  eskainitako jaialdiek.

Jaialdiaren ñabardurarik ez galtzeko, aplikazio propioa izango du  Umore Azokak, eta Twitter eta Facebook sare sozialetan jarraipen  zabala eskainiko dute antolatzaileek. Horrez gain, egitarau osoa eta  talde guztiei buruzko informazio azokaren webgunean dago jadanik. 

Iazko Umore Azoka (Marta Hernández)